2Cor 5 | NdeIBE | STEP | Siyakwazi ukuthi uma ithente lethu lasemhlabeni lidilizwa, silesakhiwo esivela kuNkulunkulu, indlu elaphakade ezulwini, engakhiwanga ngezandla zabantu.

2 Corinthians 5

Indawo Yethu Yokuhlala Ezulwini

1 Siyakwazi ukuthi uma ithente lethu lasemhlabeni lidilizwa, silesakhiwo esivela kuNkulunkulu, indlu elaphakade ezulwini, engakhiwanga ngezandla zabantu.

2 Okwakhathesi siyabubula, sifisa ukwembeswa ngekhaya lethu lasezulwini, 3 ngoba uma sesembesiwe kasiyikufunyanwa sinqunu.

4 Ngoba nxa sisesekuleli ithente, siyabubula njalo siyasindwa, ngoba kasifisi ukwembulwa kodwa ukwembeswa ngekhaya lethu lasezulwini, ukuze okufayo kuginywe yikuphila.

5 NguNkulunkulu owasidalayo ngenxa yale injongo njalo wasinika uMoya njengesibambiso, eqinisela okuzayo.

6 Ngakho sihlezi silethemba njalo siyakwazi ukuthi uma sisesekhona ekhaya emzimbeni sikhatshana leNkosi. 7 Siphila ngokukholwa, hatshi ngokubona. 8 Ngithi silethemba, njalo ngingakhetha ukuba khatshana lomzimba ngisekhaya kanye leNkosi. 9 Ngakho sikwenza kube yinjongo yethu ukuyithokozisa, langabe sisekhaya emzimbeni loba kude lawo. 10 Ngoba sonke kumele sime phambi kwesihlalo sokwahlulela sikaKhristu, ukuze lowo lalowo amukele okumfaneleyo okwezinto azenzayo esemzimbeni, langabe ngezinhle loba ezimbi.

Imfundiso Yokubuyisana

11 Ngakho njengoba sikwazi ukuthi ukwesaba iNkosi kuyini, siyazama ukubancenga abantu. Lokhu thina esiyikho kusobala kuNkulunkulu, njalo ngithemba kusobala lakuzazela zenu.

12 Kasizami ukuzibika kini futhi, kodwa silinika ithuba lokuba lizigqaje ngathi, ukuze lanelise ukubaphendula labo abazigqaja ngokubonakalayo endaweni yalokho okusenhliziyweni.

13 Uma sesiphambene ingqondo, kungenxa yokwenzela kwethu uNkulunkulu; uma siphelele engqondweni, senzela lina.

14 Ngoba uthando lukaKhristu luyasifuqa, ngoba siyakholwa ukuba oyedwa wafela bonke, ngakho bonke bafa. 15 Wafela abantu bonke ukuze abaphilayo bangaziphileli bona ngokwabo, kodwa lowo owabafelayo wavuswa njalo.

16 Ngakho-ke kusukela khathesi kusiya phambili kasikhangeli muntu ngengqondo yasemhlabeni. Lanxa sake sakhangela uKhristu ngale indlela, kasisakwenzi. 17 Ngakho uma umuntu ekuKhristu, uyisidalwa esitsha; okudala akusekho, sekufike okutsha. 18 Konke lokhu kuvela kuNkulunkulu owasibuyisela kuye ngoKhristu wasinika imfundiso yokubuyisana:

19 ukuthi uNkulunkulu wayebuyisa umhlaba kuye ngoKhristu, abantu engababaleli izono zabo. Njalo usesinike ilizwi lokubuyisana.

20 Ngakho-ke singabameli bakaKhristu, ngokungathi uNkulunkulu wenza isikhalazo sakhe ngathi. Siyalincenga simele uKhristu sithi: Buyisanani loNkulunkulu.

21 UNkulunkulu wamenza waba yisono owayengelasono ngenxa yethu, ukuze kuthi kuye sibe yikulunga kukaNkulunkulu.